ភ្នំពេញ៖ មេដឹកនាំយោធាមីយ៉ាន់ម៉ាលោក មីន អោងលាំង បានសន្យាជាមួយប្រធានអាស៊ានថានឹងអនុញ្ញាតដល់ប្រេសិតពិសេសអាស៊ានពីកម្ពុជាក្នុងពេលមកធ្វើទស្សនកិច្ចនាពេលខាងមុខបានជួបជាមួយសមាជិកគណបក្សរបស់លោកស្រី អង់សាន ស៊ូជី។ នេះជាការបញ្ជាក់របស់រដ្ឋមន្ត្រីប្រតិភូអមនាយករដ្ឋមន្ត្រី លោក កៅ គឹមហួន។

ការសន្យានេះបានធ្វើឡើងនៅក្នុងជំនួបតាមរយៈវីដេអូអនឡាញកាលពីថ្ងៃទី២៦ ខែមករា ជាមួយនាយករដ្ឋមន្ត្រីកម្ពុជា សម្តេចតេជោ ហ៊ុន សែន។

រដ្ឋមន្ត្រីប្រតិភូអមនាយករដ្ឋមន្ត្រីកម្ពុជា លោក កៅ គឹមហួន និយាយថា លោក មីន អោងលាំង មិនបានកំណត់អត្តសញ្ញាណសមាជិកនៃគណបក្ស NLD ណាមួយដែលអាចនឹងត្រូវបានផ្តល់ជូនឱ្យបានជួបជាមួយនឹងប្រេសិតពិសេសនោះទេ។

លោក កៅ គឹមហួន បានលើកឡើងដូច្នេះថា៖ «ពួកគេបាននិយាយក្នុងអំឡុងពេលសន្និសីទតាមវីដេអូរវាងនាយករដ្ឋមន្រ្តីរបស់យើង និងឧត្តមសេនីយឯក មីន អោងលាំង ថាពួកគេនឹងផ្តល់សិទ្ធិឱ្យចូលទៅជួបសមាជិកមួយចំនួននៃគណបក្ស NLD ប៉ុន្តែយើងមិនទាន់ដឹងថាជាអ្នកណានៅឡើយទេ»។

ពាក់ព័ន្ធនឹងរឿងនេះ អ្នកនាំពាក្យរបបយោធាមីយ៉ាន់ម៉ាមិនបានលើកទូរស័ព្ទដើម្បីឆ្លើយតបនៅឡើយទេ។

មីយ៉ាន់ម៉ា មានវិបត្តិចាប់តាំងពីយោធាបានដណ្តើមអំណាច ដោយជនស៊ីវិលប្រហែល ១ ៥០០នាក់ត្រូវបានសម្លាប់នៅក្នុងការបង្រ្កាបរបស់របបយោធា នេះបើយោងតាមតួលេខដែលដកស្រង់ដោយការិយាល័យសិទ្ធិមនុស្សរបស់អង្គការសហប្រជាជាតិ។

ក្នុងនោះក៏មាន សមាជិកគណបក្ស NLD រាប់សិបនាក់ត្រូវបានឃុំខ្លួនចាប់តាំងពីរដ្ឋប្រហារថ្ងៃទី១ ខែកុម្ភៈ ឆ្នាំ ២០២១។

អ្នកនាំពាក្យរបស់គណបក្ស NLD លោក ណៃ ហ្វូឡាត បាននិយាយថា កិច្ចប្រជុំណាមួយជាមួយប្រេសិតពិសេសអាស៊ាន គួរតែត្រូវបានយល់ព្រមដោយគណបក្ស៕